ضل راجل و لا ضل حيطة
*****
وقفت الست بهية على كوم عالى فى الجرن
وبدأت تخطب وسط الحريم المرصوصين على المصاطب :
قال بيقولوا ضل راجل ولا ضل حيطة ... ياختى بلا وكسة !
بذمتك عمرك سمعتى عن حيطة تقعد تشخر طول الليل وماتخلكيش تعرفى تنامى ؟
والا حيطة تدخل من باب البيت تجعر عايزة الغدا
وبعدين تطين عيشتك علشان الملح طلع زيادة فى البامية !
والا ممكن ترجعى البيت فى يوم تلاقى حيطة بتبوس الخدامة ؟
طيب شفتى حيطة تملا لك سقف البيت دخان ، وأرضيته سبارس !
والا حيطة تقعد تتنك عليكى وتقولك انتى رايحة فين وجاية منين !
والا حيطة تصحيكى فى نص الليل علشان معرفش إيه طلع فى دماغها !
والا حيطة تدوخك وراها علشان تشوفى هيه بتكلم مين فى التليفون بعد نص الليل !
طيب دى الحيطة معروف مكانها دايماً ، إنما المحروس يدوخك وراه علشان تعرفى
هو سهران فى أنهى داهية ... قال إيه ، عنده شغل ! ياسم !
بذمتك فيه حيطة تحاول تطلعك غلطانة فى كل كلمة تقوليها
علشان تثبت للعيال إن الحيطة بتفهم أحسن منك .
والا حيطة تلوى بوزها وتقعد بالفانلة والكلسون لما أمك تيجى تزورك
وتحبك معاها تحكى نكت عن الحموات !
والا حيطة تقعد تقولك ماتخرجيش بالفستان ده أحسن محزق عليكى
ولما تقولى لها هاتى فلوس علشان تشترى فستان غيره
تعمل ودن من طين وودن من عجين ، طيب دى حتى الحيطان لها ودان .
ياشيخة بلا قرف ... بلا نيلة ... الحيطة أجدع ، على الأقل مش حتتحبسى
لو فاض بيكى ونفذتى حلم كل الستات ... ودقيتى فى الحيطة مسمار !!!!!
موضوع: ضل راجل ولا ضل حيطة ! 
الأربعاء نوفمبر 14, 2007 9:49 am
